Studentët e mjekësisë që vijnë nga komunat e Anamoravës mund të aplikojnë për të përfituar dy bursa, me vlerë nga 500 euro secila

Me rastin e tre vjetorit të ndarjes nga jeta të internistit dhe nefrologut Dr.Feti Hetemi, duke respektuar dëshirën e madhe të tij për të pasur sa më shumë kuadro të mjekësisë, familja Hetemi, përmes Fondacionit “Dr. Feti Hetemi” me qëllim të mbështetjes së studentëve të suksesshëm dhe me burime të kufizuara ekonomike, do të vazhdojë traditën duke mbështetur këtë vit dy studentë ose stundente të Fakultetit të Mjekësisë, që vijnë nga komuna e Vitisë, Gjilanit ose Kamenicës, me dy bursa në vlerë nga 500 euro.

Sikurse vitet paraprake, edhe këtë vit, kriteret për ndarjen e bursës janë rezultatet e larta akademike dhe gjendja jo e mirë ekonomike e kandidatëve. Por për ndryshim nga vitet paraprake, Fondacioni këtë vit jep dy bursa, duke i përfshirë edhe komunat e Gjilanit dhe Kamenicës, pasi që Dr. Hetemi ishte iniciator dhe ndër themeluesit e Repartit të Hemodializës në Spitalit rajonal në Gjilan dhe aktiviteti i tij humanitar edhe si kryetar i Sh.H.B “Nëna Terezë” shtrihej në tërë Anamoravën.

Në një njoftim të Fondacionit “Dr. Hetemi”, ku shpall të hapur thirrjen për aplikim, thuhet se ata studentë të mjekësisë që dëshirojnë të aplikojnë për këtë bursë, këtë mund ta bëjnë nga sot, më 19 korrik deri më 15 gusht të këtij viti, duke plotësuar aplikacionin. Bursat e bazuar në mesataren e lartë dhe në nevojën financiare, do të jenë të vlefshme për aplikuesit që plotësojnë kushtet e aplikimit dhe përzgjedhja e fituesve do të jetë përgjegjësi e komisionit profesional të vlerësimit të aplikantëve.

“Aplikantët duhet të bashkangjesin certifikata e notave së bashku me kërkesën (Aplikacionin). Bursat do të ndahen më 19 gusht 2023. Vlera e bursave do të jetë nga 500 euro secila.
Inkurajojmë studentët të aplikojnë në këtë e-mail: fondacionidrfetihetemi@gmail.com deri më datën 15 gusht, 2023. Formularin me hollësi të tjera për të aplikuar online mund ta shkarkoni duke klikuar në këtë LINK“, thuhet në njoftimin zyrtar të Fondacionit “Dr. Feti Hetemi”.

Ky është viti i tretë me radhë që jepet bursa në emër të mjekut të njohur të Anamoravës, Dr. Feti Hetemi, i cili ndërroi jetë nga Covid-19 më 19 gusht të vitit 2020.

Por këtë vit familja Hetemi ka vendosur ta rris numrin e bursave nga 1 që ishte dhënë në dy vitet e kaluara në dy bursa për këtë vit.

Dokumentarin mbi jetën dhe veprimtarinë e Dr. Hetemit mund ta ndiqni më poshtë: