Elton Ismajlin e fton Italia e ai dëshiron të luaj për Kosovën

Karrierë prej futbollisti të suksesshëm po bënë në Itali, por më shumë se për kombëtaren azure, gjashtëmbëdhjetëvjeçari Elton Ismajli dëshiron të vesh fanellën e përfaqësueses dardane – Kosovës.
I lindur më 2005, sulmuesi i krahut Elton Ismajli, disa herë kishte marrë ofertë për të luajtur për përfaqësuesen U-17 të Italisë, por siç thekson ky djalosh me prejardhje nga Kosova, gjithnjë e kishte patur ëndërr që të luaj për vendin e të parëve të tij, për Kosovën. Elton Ismajli, luan në Serie D dhe falë paraqitjeve të mira të tija si sulmues krahu, ai ka marrë ofertë nga ekipi i mirënjohur italianSpal,

andaj ky lojtar me një ardhmëri të ndritur këtë ofertë serioze e sheh si një mundësi të mirë për të treguar veten dhe tërë talentin që posedon. Në të dhënat e tij nga klubi, sqarohet se pozita e preferuar për lojë e Elton Ismajlit është sulmues i krahut të majtë, por se ai mund të luaj edhe në pozitat tjera në sulm, në krahun e djathtë, por edhe si qendërsulmues. Ai ndonëse është ende i ri, ka gjatësinë e duhur mbi 180 centimetra, sikurse edhe peshën, derisa statistikat e tija në tri vitet e kalura janë tejet mbresëlënëse qoftë si golashënues, por edhe si asistues. Ai ka teknikën, përgatitjen e duhur fizike, qëndrueshmërinë, por edhe vizionin për lojë. Njohësit e futbollit, atë e përshkruajnë si tejet të rrezikshëm me gjuajtjet nga largësia, harkimet dhe pasimet e gjata, si një luftëtar të madh për çdo top, të përkushtuar në lojë e në ushtrime dhe me sjellje sportive në fushë.
Eltoni që më me dëshirë veten e tregon në fushë se sa me fjalë, thekson se ëndërr e tij është që të vesh petkun e përfaqësueses së Kosovës dhe se shpreson që shumë shpejt një gjë e tillë do të bëhet realitet. Padyshim se në sukseset e tij, një rol domethënës kanë edhe prindërit e tij që iu gjetën afër gjithmonë kur e kërkonte nevoja e dëshira e tij për Vitin e Ri në të cilin sapo kemi hyrë gjithsesi se është e lidhur me futbollin për arritjen e rezultateve edhe më të mëdha, derisa beson se shumë shpejtë do t’i realizohet dëshira e kamotshme që të tund rrjetat kundërshtare, por në fanellën e Kosovës.