Numër i lartë i mësimdhënësve që kanë paditur Komunën e Gjilanit

Kryetari i ri i Gjilanit, Alban Hyseni, në një komunikim të tij me gazetarë ka njoftuar për aktivitetet e tij komunale.

Hyseni, në mes tjerash, ka folur edhe për paditë e shumta të mësimdhënësve gjilanas ndaj Komunës së Gjilanit, përkatësisht Drejtorisë së Arsimit në këtë qytet, raporton Plus TV.

Sipas Hysenit, këta mësimdhënës kanë paditur komunën në Gjykatë për tri pagat jubilare teksa ai shtoi se do t’i kryej të gjitha obligimet që i takojnë komunës ndaj këtyre paditësve.

“Një problem që po na shoqëron me Drejtorinë Komuanale të Arsimit, janë paditë e shumta që vijnë nga mësimdhënësit për pagat jubilare, dhe për probleme të ngjashme, këto janë duke u trajtuar bashkë me zyrën ligjore në komunë, pas emërimit të drejtorëve, do të zhvillojë edhe takime tjera, do të tentojë që në grupe të ndara të takojë mësimdhënësit në komunën tonë, në mënyrë që të zotohem para tyre, që obligimet që i takojnë komunës të përmbyshen, dhe në të njëjtën kohë të mos lejojmë që të na grumbullohe paditë”, tha ai.

Hyseni gjatë konferencës, nuk tregoi sakt se sa është numri i mësimdhënësve që kanë ushtruar padi në Gjykatë.

I pari i Gjilanit, tha se vetëm nga paditë aktuale komuna ka miliona euro borxhe, çështje kjo me të cilën tha se do të merret seriozisht posa të konstatojë gjendjen reale.

“Vetëm nga paditë aktuale, që i kemi në gjykatë e procese gjyqësore, komuna i ka rreth 14. 236 milion euro borxh, borxhe në procese gjyqësore, nderkaq kemi edhe pjesën tjetër të borxheve të cilën, do ta marrim tash pas përfundimit të vitit 2021, ku edhe do të konstatojmë gjendjen reale të borxheve të komunës,” tha Hyseni.

I pyetur nga gazetarët, Hyseni ka thënë se është në diskutime për formimin e kabinetit qeverisës bashkë me partnerët e tij politik. Kujtojmë se javën e kaluar, Gjilani ka zgjedhur kryesuesin e kuvendit Arianit Sadikun nga VV, pasi kryetari Hyseni arriti koalicion qeverisës me PDK-në, parti kjo që më herët kishte qenë në opozitë.

Kësaj të fundit do i takojë pozita e nënkryetarit të komunës dhe katër drejtori, ndërkaq partia fituese e zgjedhjeve VV do të udhëheq me drejtoritë të tjera.

Koalicioni VV-PDK në nivel lokal ka nxitur reagime e kritika të shumta në Anamoravë./PlusTV/