Rama lë të hapur mundësinë e legalizimit të kanabisit

Dy ditë pasi deklaroi se do të legalizojë kultivimin e kanabisit për qëllim mjekësor, kryeministri Edi Rama ka paralajmëruar për ta çuar nismën më tej.

Gjatë Kongresit të Partisë Socialiste, të mbajtur në Pallatin e Kongreseve të shtunën, kreu i qeverisë tha se vitin e ardhshëm do të merret mendim nga qytetarët për legalizimin e kanabisit për përdorim rekreativ.

“Vitin tjetër do i pyesim (qytetarët) nëse doni për përdorim vetjak (legalizimin e kanabisit)”, tha Rama duke shtuar se këtë e ka bërë ‘1/3 e vendeve të botës’.

Gjatë fjalës, kryeministri u shpreh se me legalizimin e kanabisit për qëllime mjekësore do të krijohen vende të reja pune.

Në pyetësorin e Këshillit Kombëtar, një nga 12 pyetjet ishte nëse duhet lejuar kultivimi i kanabisit për qëllime mjekësore.

Rezultati tregoi se 61% e shqiptarëve të pyetur janë shprehur pro legalizimit të kanabisit për përdorim mjekësor.

Në bazë të të dhënave të sondazhit të organizuar në datat 19 janar-31 mars, rreth 309 mijë nga mbi 500 mijë shqiptarë i janë përgjigjur pozitivisht.

Ndryshe nga sondazhet profesionale, pyetësori i qeverisë shoqërohej me një shpjegim duke orientuar qytetarët drejt një alternative të caktuar.

Pyetja shoqërohej me shpjegimin se kanabisi mjekësor ka efekte kurative dhe se shfrytëzimi i kontrolluar ka sjellë ndikim pozitiv jo vetëm në shëndetësi por edhe në ekonomi./euronewsalbania/