Profesori nga Gofilja që bëri rrugë shkencore deri në Zagreb
Më 18 nëntor të vitit të 2019, në Gjilan, në moshën 77-vjeçre ndërroi jetë profesori i Botanikës, Ferat Rexhepi (1942), i lindur në fshatin Gofile të komunës së Skenderajt.
Derisa u pensionua, Rexhepi punoi në Prishtinë, kurse jetoi në Gjilan, ku ishte një njeri dhe kuadër i respektuar deri në vdekje.
Shkollimi i tij nisi në Skenderaj, ndërsa vazhdoi tutje në Mitrovicë, Prishtinë, Zagreb e Novi Sad, deri në doktoratë.
Derisa ishte student, punoi si mësimdhënës i lëndës së biologjisë në një shkollë fillore në Prishtinë dhe Obiliq.
Studimet pasuniversitare i ka mbaruar në Universitetin e Zagrebit, dega e Botanikës, në temën “Flora dhe vegjetacioni i Novobërdës”, ndërsa doktoratën, në temën “Fitocenozat barishtore në regjionin kodrinor të Kosovës” e ka mbrojtur në Universitetin e Novi Sadit (1978).
Punoi si asistent i Botanikës, pastaj ligjërues, profesor in ordinar dhe profesor ordinar i kësaj lënde.
Ferat Rexhepi, krahas punës me studentë si ligjërues i Botanikës, është marrë edhe me punë hulumtuese-shkencore në fushën e florës dhe vegjetacionit dhe ka botuar shumë punime e studime nga këto fusha. Është autor edhe i disa teksteve universitare.
