Kush ishte Tefik Selimi?

Tefik Selimi është i lindur në fshatin Nasale, komuna e Gjilanit. Shkollën fillore e kreu në Zhegër, ndërsa shkollën e mesme (ekonomike), në Gjilan.Pas shkollimit të mesëm, vazhdoi studimet e rregullta në Fakultetin Filozofik në Degën e Gjuhës dhe Letërsisë Shqipe në Universitetin e Prishtinës. Pas studimeve, filloi të punojë profesor në gjimnazin “Zenel Hajdini” të Gjilanit, nga viti 1972/73.

Me shkrime është marrë qysh nga fëmijëria. Ka qenë bashkëpunëtor i rregullt në gazetën “Rilindja”. Kētu botoi shkrime gazetareske, vjersha për fëmijë e për të rritur. Më vonë ka bashkëpunuar me shumë gazeta e revista shqipe në Kosovë, si:

“Zëri i rinisë”,

“Shkëndija”,

“Kosovarja”,

“Pionieri”,

“GEP”,

“Flaka e vëllazërimit”,

“24 Orë”,

“Pavarësia”,

“liria post”,

“Lajm”,

“Zëri”,

“Bota sot”,

“Bota press” etj.

Ka punua edhe gazetar i rregullt në gazetën kombëtare “Bota sot” e “Botapress” nga Gjilani. Në këtë gazetë më tepër ka shkruar për dëshmorët, martirët e për disa figura të njohura të arsimit shqip, por ka botuar edhe disa fejtone, reportazhe dhe dokumentare në vazhdime. Gjer më tani ka botuar këto libra:

“Gjaku i pragjeve” (2002),

“Flijimtarët e plëngjeve” (2010),

“Bota e Yjeve” (2011),

“Lule prilli” (2012),

Monografia “Gjimnazi “Zenel Hajdini” i Gjilanit – (1945-2013) (2013).

Libri “Pragjet e përgjakura” ose (ditar lufte (1999), është libri i gjashtë dokumentar me radhë i tij (2014).

Para tri vitesh, më 24 janar 2019, në një ditë të  ftohtë, në Gjilan ndërroi jetë profesori dhe gazetari Tefik Selimi.