Ali Mulaj, biri dhe burri i palodhur që një jetë i shërbeu popullit

Profesori nga Medvegja, Rexhep Abazi ka bërë një dedikim për tropojanin Ali Mulaj, në njëvjetorin e vdekjes së doktorit, artistit, burrit të veçantë të kombit e atdheut, i cili një jetë të tërë e kaloi në shërbim të popullit.

Postimi i plotë:

I qetë, i këndshëm, i afërt me secilin e para së gjithash njeri me kulturë të lartë – kështu e njoha dhe kështu mbeti deri në fundin e jetës Doktor Ali Mulaj, biri dhe burri i palodhur i Tropojës e i Malësisë së Gjakovës.

E takova dhe e njoha në qytetin e Bajram Currit, në festivalin folklorik ‘Sofra Dardane’, kur për herë të parë merrnim pjesë me grupin folklorik ‘Shpëtimi’ nga Medvegja, në qershor të vitit 2006.

Në defile i kishte rënë në sy transparenti i këtij grupi nga kjo trevë shqiptare dhe na ofrohet me buzëqeshje për t‘na përshndetur.

Që nga kjo kohë gjithmonë sa herë që takoheshim e ai ishte pothuaj se në çdo aktivitet kulturor në trojet shqiptare, nuk mund ta përshendesnim pothuaj se kurrë përpara, gjithmonë na grabiste i pari të na përshëndeste, me ngrohtësi vëllezërore.

Me fjalët e buta e qetësinë që kishte ai na inkurajonte të qëndronim stoik sepse do ketë zgjidhje edhe për ate pjesë të tokës shqiptare.

Ishte njeri i mirë, shpirtbardhë e zemër gjerë. Për vlerat dhe kontributin e tij më folën edhe bashkëpunëtorët e shokët e tij e që vëreheshin gjithkund e në çdo kohë e vend, sepse ai edhe pse në moshë të shtyrë ishte çdo kund në aktivitete kulturore e kombëtare.

Në varrim nuk pata mundësi të merrja pjesë, por dje, me 25 nëntor 2021, shkova nga Medvegja në Bajram Curr për të pame.

Falënderoj shumë z. Shpend Bishevën dhe z. Rexhep Hasanin të cilët më ndihmuan dhe më shoqëruan deri tek familja e të ndjerit për ta kryer këtë obligim sipas adeteve shqiptare.

I qoftë i lehtë dheu i tokës shqiptare.
Ngushëllime familjes, bashkëpunëtorëve dhe Malësisë së Gjakovës.

Medvegjë, 26 nëntor 2021
Prof. Rexhep Abazi

/mediafokus/